Mae Gwasanaeth Tân ac Achub Gogledd Cymru wedi bod yn ceisio rheoli tân mawr ar Fynydd Bodafon ym Môn dros nos.
Yn ôl llygad-dyst mae’r tân dal ynghyn fore Sadwrn.
Mewn datganiad fe ddywedodd y gwasanaeth “bod nifer o bobl wedi troi fyny yn yr ardal nos Wener a bod cerbydau’n rhwystro’r llwybrau i’r gwasanaethau brys”.
Ychwanegodd y datganiad eu bod yn annog y cyhoedd i gadw draw o’r ardal a pheidio parcio ar y ffyrdd ger y digwyddiad “fel y gall ein criwiau tân barhau i ddelio â’r tân”.
Yn y datganiad diweddaraf am hanner nos, nos Wener fe ychwanegodd y Gwasanaeth Tân bod ffyrdd ger yr ardal ar gau ac y bydd y criwiau tân yn bresennol am yr oriau nesaf.
Dywedodd llefarydd eu bod yn parhau i dderbyn llawer o alwadau am y digwyddiad, ac maen nhw’n annog pobl i beidio â ffonio 999 i roi gwybod am y digwyddiad eto gan eu bod eisoes yn bresennol ac yn ymwybodol o’r tân.
